एनटीपीसी सोलापूरमध्ये ‘बालिका सशक्तिकरण अभियान - 2025’चा भव्य शुभारंभ

 एनटीपीसी सोलापूरमध्ये ‘बालिका सशक्तिकरण अभियान - 2025’चा भव्य शुभारंभ

सोलापूर, (कटूसत्य वृत्त):- एनटीपीसी सोलापूरमध्ये आज ‘बालिका सशक्तिकरण अभियान (GEM)-2025’चा भव्य शुभारंभ करण्यात आला. या प्रसंगी सोलापूरच्या डीसीपी (क्राईम) सौ. दीपाली काले प्रमुख पाहुण्या म्हणून उपस्थित होत्या. उपस्थित पालकांना संबोधित करताना त्यांनी सांगितले की, "आपल्या मुली खूप नशिबवान आहेत ज्यांना या कार्यशाळेचा भाग होण्याची संधी मिळाली आहे. इथे शिकलेल्या गोष्टी त्या नियमित करत राहिल्या तर भविष्यात त्या आपले व आपल्या देशाचे नाव उज्वल करतील."
या कार्यक्रमासाठी एनटीपीसी सोलापूरचे कार्यकारी संचालक बी.जे.सी. शास्त्री, महाप्रबंधक (ऑपरेशन अँड मेंटेनन्स) एम.के. बेबी, सृजनात्मक महिला मंडळाच्या अध्यक्षा श्रीमती पद्मा शास्त्री व इतर वरिष्ठ अधिकारी उपस्थित होते.
कार्यकारी संचालक बी.जे.सी. शास्त्री यांनी सांगितले, "GEM हा केवळ एक कार्यक्रम नाही, तर हा एक संकल्प आहे – मुलींना सक्षम बनवण्याचा, त्यांना पाठिंबा देण्याचा आणि त्यांच्यावर विश्वास ठेवण्याचा. या मुली म्हणजे फक्त लहान मुले नाहीत, तर त्या आपल्या देशाचे उज्ज्वल भविष्य आहेत."
‘बालिका सशक्तिकरण अभियान (GEM)’ ही एक चार आठवड्यांची निवासी उन्हाळी कार्यशाळा आहे. या कार्यशाळेत प्रकल्प प्रभावित गावातील 10 ते 12 वर्षे वयोगटातील, 5वी उत्तीर्ण मुलींची निवड केली जाते. कार्यशाळेत इंग्रजी, हिंदी, मराठी, गणित यासारख्या विषयांचे शिक्षण दिले जाते आणि कला, खेळ, योग याचा देखील समावेश असतो, जेणेकरून मुलींचा सर्वांगीण विकास साधता येईल.
या वर्षी अहेरवाडी, होटगी, होटगी स्टेशन व तिल्लेहाल गावांमधील एकूण 42 मुलींची निवड झाली आहे. त्यांना इंग्रजी, गणित, विज्ञान, योग, आत्मरक्षण, कला, संगीत आणि इतर सृजनशील कौशल्यांचे प्रशिक्षण दिले जाईल. त्यांना आरोग्य तपासणी, पोषक आहार, आवश्यक साहित्य, गणवेश व शैक्षणिक साधनांची सुविधा दिली जाईल.
कार्यक्रमाच्या शेवटी, चार सर्वोत्तम विद्यार्थिनींना एनटीपीसी टाउनशिप स्कूलमध्ये संपूर्ण शिष्यवृत्तीवर प्रवेश दिला जातो. हा उपक्रम केवळ शिक्षणापुरता मर्यादित नसून, आत्मविश्वास, नेतृत्व आणि समान संधी यासाठी एक मजबूत पाया घालतो.