शेटफळच्या जिल्हा रुग्णालयात कोवीड टेस्टिंग आणि लसीकरण आणि कोवीड सुवीधा सुरू करा - बाळराजे पाटील

शेटफळच्या जिल्हा रुग्णालयात कोवीड टेस्टिंग आणि लसीकरण आणि कोवीड सुवीधा सुरू करा - बाळराजे पाटील

जि. प. सदस्य बाळराजे पाटील यांची जिल्हा आरोग्य प्रशासनाकडे मागणी

          मोहोळ (साहील शेख): मोहोळ तालुक्यातील शेटफळ येथील जिल्हा रुग्णालयामध्ये गेल्या वर्षभरापासून ना करोनाच्या टेस्ट घेतल्या जात आहेत, ना कधी कोवीड प्रतिबंधक लस देण्याची सोय केली आहे. त्यामुळे सध्या शेटफळ पंचक्रोशीतील  रुग्णांना प्रचंड हेळसांड सहन करावी लागत आहे . या जिल्हा रुग्णालयात कोवीड विषयक सुविधा नसल्याने नागरिकांना अन्य तालुक्यातील खाजगी दवाखान्याकडे नाइलाजाने या सेवांसाठी जावे लागत आहे. त्यामुळे हे शेटफळचे हे जिल्हा रुग्णालय केवळ असून अडचण आणि नसून खोळंबा अशा अवस्थेत आहे. त्यामुळे जिल्हा रुग्णालयात त्वरित कोवीडचे लसीकरण आणि कोवीडच्या टेस्टची सोय त्याचबरोबर  प्रशस्त इमारत असल्यामुळे अद्यावत कोवीड सेंटर सुरू करण्याची मागणी जिल्हा परिषदेचे माजी उपाध्यक्ष तथा लोकनेते कारखान्याचे चेअरमन जि प सदस्य बाळराजे पाटील यांनी माध्यमांशी बोलताना केली. 

          याबाबत जिल्हाधिकारी मिलिंद शंभरकर यांच्याकडे रीतसर मागणी करणार असून कोट्यवधी रुपये खर्चून देखील हे दर्जेदार सेवा देऊ शकणारे जिल्हा रुग्णालय वैद्यकीय अधिकारी आणि कर्मचाऱ्यांनी कोवीड उपाययोजनांबाबत का बंद ठेवले आहे ? गेल्या वर्षभरापासून कोवीड सारखी महामारी चालू असतानासुद्धा उपजिल्हा रुग्णालयाच्या दर्जाचे जिल्हा रुग्णालयात अनभिज्ञ कसे ? असा सवालही यावेळी त्यांनी उपस्थित केला.

          या महत्त्वाच्या मुद्द्याबाबत बोलताना बाळराजे पाटील म्हणाले की गेल्या वर्षभरापासून मोहोळ तालुक्यातील आरोग्यव्यवस्था करोना महामारीशी मोठ्या निकराने झुंज देत आहे. मोहोळ तालुक्यातील अन्य आरोग्य केंद्रांमध्ये कोवीडच्या टेस्टिंग त्याचबरोबर कोवीडचे लसीकरण राबवताना दिसत आहेत. मात्र शेटफळच्या जिल्हा रुग्णालयात आजपावेतो तसा कोणताही कोवीडशी संदर्भात आरोग्यविषयक उपक्रम राबवला जात नाही.

          हे तालुक्याच्या या भागातील कोवीड रुग्णांचे दुर्दैवच म्हणावे लागेल अशी खंत यावेळी बाळराजे पाटील यांनी व्यक्त केली. या परिसरातील अनेक नागरिकांना इतके चांगल्या दर्जाचे उपजिल्हा रुग्णालय असून देखील खाजगी दवाखान्यावर अवलंबून राहावे लागत आहे. याबाबतची कैफियत या परिसरातील अनेक नागरिकांनी मला भ्रमणध्वनीद्वारे सांगितले आहे असेही यावेळी ते म्हणाले. 

          सोलापूर जिल्ह्यातील जवळपास सर्वच तालुक्यात कोविंड सेंटर प्रशासनाने उपलब्ध करून दिली आहे. वास्तविक पाहता शेटफळ जिल्हा रुग्णालयात सुसज्ज इमारतही तालुक्यातील सर्व आरोग्य उपकेंद्रांच्या इमारतीपेक्षा कित्येक पटीने प्रशस्त आणि अद्यावत आहे. शिवाय महामार्गालगत असलेले हे केंद्र सर्व रुग्णांना वरदान ठरू शकले असते. मात्र प्रशासनाच्या अनास्थेमुळे आणि या आरोग्य उपकेंद्र मधील वैद्यकीय अधिकारी आणि कर्मचाऱ्यांच्या हलगर्जीपणामुळे कोट्यावधी रुपये खर्चून देखील शेटफळ जिल्हा रुग्णालय आजमीतीला केवळ शोभेची इमारत म्हणून बसले आहेत. त्यामुळे किमान आता तरी जिल्हा आरोग्य प्रशासनाने शेटफळच्या जिल्हा रुग्णालयात कोवीड संदर्भात सर्व सोयी सुविधा सुरू करून येथे कोविड सेंटर सुरू करावे अशी आमची मागणी आहे. - बाळराजे पाटील (चेअरमन लोकनेते शुगर तथा जि प सदस्य सोलापूर)