शेतकरी वर्षातून नऊ महिने पत्ते खेळतात, दारू-गांजा ओढतात! भाजप खासदाराच्या बेताल विधानाने शेतकऱ्यांचा संताप

 शेतकरी वर्षातून नऊ महिने पत्ते खेळतात, दारू-गांजा ओढतात! भाजप खासदाराच्या बेताल विधानाने शेतकऱ्यांचा संताप

अन्नदात्याच्या कष्टांची जाहीर थट्टा; शेतकरीविरोधी मानसिकतेवरून भाजपवर टीकेची झोड

नवी दिल्ली (कटूसत्य वृत्त):- देशाचा पोशिंदा असलेल्या शेतकऱ्यांच्या कष्टांची जाणीव ठेवण्याऐवजी त्यांचीच खिल्ली उडवण्याचा संतापजनक प्रकार भाजपच्या एका खासदाराच्या विधानातून समोर आला आहे. मध्य प्रदेशातील भाजप खासदार जनार्दन मिश्रा यांनी शेतकरी वर्षातून केवळ तीन महिने काम करतात, तर उर्वरित नऊ महिने पत्ते खेळतात, दारू पितात आणि गांजा ओढतात, असे वादग्रस्त विधान केल्याचा दावा करण्यात येत आहे. या विधानामुळे शेतकरी वर्गातून तीव्र संताप व्यक्त होत असून भाजपच्या शेतकरीविषयक भूमिकेवर प्रश्नचिन्ह उपस्थित केले जात आहे.

ऊन, वारा, पाऊस, थंडी, अतिवृष्टी, अवकाळी पाऊस आणि दुष्काळ अशा निसर्गाच्या असंख्य संकटांशी दोन हात करत शेतकरी शेती पिकवतो. बियाणे, खते, औषधे, मजुरी, वीज आणि इंधन यांच्या वाढत्या खर्चाचा भार सहन करतो. पीक हातात येईपर्यंत त्याच्या डोक्यावर कर्जाचा डोंगर उभा असतो. कधी पाऊस दगा देतो, तर कधी बाजारभाव कोसळतो. पीक विकूनही उत्पादन खर्च निघेल की नाही, याची शाश्वती नसते. अशा परिस्थितीत देशातील कोट्यवधी नागरिकांचे पोट भरणाऱ्या शेतकऱ्यांना नऊ महिने पत्ते खेळणारे, दारू आणि गांजा ओढणारे म्हणणे म्हणजे त्यांच्या श्रमांचा आणि जगण्याच्या संघर्षाचा अपमानच आहे.

शेतकऱ्यांच्या नावाने राजकारण, सत्तेत गेल्यावर अपमान?

निवडणुका आल्या की शेतकरी हा राजकीय पक्षांच्या भाषणांचा केंद्रबिंदू असतो. शेतकऱ्यांचे उत्पन्न दुप्पट करण्याची आश्वासने दिली जातात. कर्जमाफी, हमीभाव, पीकविमा आणि शेतमालाला योग्य दर देण्याच्या घोषणा केल्या जातात. मात्र, प्रत्यक्षात शेतकऱ्यांच्या पदरी काय पडते, हा स्वतंत्र चर्चेचा विषय आहे. त्यातच सत्ताधारी पक्षाच्या खासदाराकडून शेतकऱ्यांच्या जीवनशैलीविषयी असे अवमानकारक विधान होत असेल, तर ही केवळ एका व्यक्तीची जीभ घसरली असे म्हणून विषय संपवता येणार नाही.

शेतात उतरल्याशिवाय कष्ट कसे कळणार?

शेतकऱ्याचे वर्ष केवळ पेरणी आणि कापणीपुरते मर्यादित नसते. जमिनीची मशागत, पेरणी, निंदणी, फवारणी, पाणी व्यवस्थापन, पीक संरक्षण, काढणी, वाहतूक आणि बाजारपेठेतील संघर्ष अशा असंख्य टप्प्यांतून त्याचे वर्ष सरते. शेतीतील काम संपले तरी पुढील हंगामाची तयारी आणि कर्जफेडीची चिंता त्याची पाठ सोडत नाही. शेतकऱ्यांच्या बांधावर जाऊन त्यांचे वास्तव पाहण्याऐवजी त्यांच्यावर अशा प्रकारची शेरेबाजी करणे म्हणजे अन्नदात्याच्या जखमेवर मीठ चोळण्यासारखे आहे.

खासदार जनार्दन मिश्रा यांच्या विधानावर भाजपच्या वरिष्ठ नेतृत्वाने काय भूमिका घेतली, या विधानाबाबत त्यांनी स्पष्टीकरण दिले का आणि शेतकऱ्यांची जाहीर माफी मागणार का, असे प्रश्न उपस्थित होत आहेत.

अन्नदाता आळशी नाही, तर व्यवस्थेच्या अपयशाचा बळी!

देशातील शेतकरी आळशी असल्यामुळे नव्हे, तर शेतीतील अनिश्चितता, वाढता उत्पादन खर्च, बाजारपेठेतील लूट आणि धोरणात्मक अपयशामुळे संकटात आहे. शेतकऱ्यांच्या कष्टांचा अपमान करणाऱ्यांनी एकदा तरी प्रत्यक्ष शेतात उतरून घाम गाळावा. एसी कार्यालयात बसून अन्नदात्याच्या मेहनतीचे मूल्यमापन करणे सोपे असते; मात्र उन्हातान्हात राबून भाकरी पिकवण्याची वेदना अनुभवावी लागते, तेव्हाच शेतकऱ्यांचे वास्तव समजते.

शेतकऱ्यांच्या मतांवर सत्तेची शिखरे गाठायची आणि त्याच शेतकऱ्यांना चारित्र्याचे दाखले द्यायचे, ही दुटप्पी भूमिका किती दिवस चालणार? अन्नदात्याच्या कष्टांची थट्टा करणाऱ्या लोकप्रतिनिधींनी निदान आपल्या पदाची आणि जबाबदारीची जाणीव तरी ठेवावी, अशी संतप्त भावना शेतकरी वर्गातून व्यक्त होत आहे.