स्वाभिमानी'चे राष्ट्रीय महामार्गावरील आंदोलन स्थगित

 स्वाभिमानी'चे राष्ट्रीय महामार्गावरील आंदोलन स्थगित

 स्थानिक आंदोलनानंतर मुंबईकडे कूच करणार

कोल्हापूर (कटूसत्य वृत्त):- सामान्य जनतेला होणारा त्रास टाळण्यासाठी स्वाभिमानी शेतकरी संघटनेने पुणे बेंगलोर राष्ट्रीय महामार्गावरील कोगनोळी नाका येथील आंदोलन तूर्तास स्थगित करण्यात आले असल्याची माहिती नेते राजू शेट्टी यांनी दिली.

आता आंदोलनाची दोन पथके करण्यात आली आहेत. पहिले पथक कोगनोळी परिसरात ‘कर्नाटक राज्य रयत संघ’सोबत काम करेल, तर दुसरे पथक सोलापूर व इतर जिल्ह्यांत सुरू असलेले साखर कारखान्यांचे गाळप आणि ऊस वाहतूक बंद पाडण्यासाठी पुढील ३ दिवस सक्रिय राहील. उद्यापासून बाहेर पडणारी साखर अडवण्यावर भर दिला जाईल. या बदलामुळे महामार्गावरील वाहतूक पूर्ववत झाली असून, ३ दिवसानंतर दोन्ही पथके एकत्र येऊन मुंबईच्या दिशेने कूच करतील.

केंद्राची समिती स्थापन

ऊसाला अधिक मोबदला आणि साखरेच्या किमान विक्री हमी भावात सुधारणा करण्याच्या ऊस उत्पादक शेतकऱ्यांनी उपस्थित केलेल्या मागण्यांची दखल बुधवारी केंद्र सरकारने घेतली आहे. यासंदर्भात नीती आयोगाचे माजी सदस्य प्रा. रमेश चंद यांच्या अध्यक्षतेखाली एक समिती स्थापन केली असून त्यामध्ये कृषी साखर आयुक्तालय अन्न व नागरी पुरवठा विभागाच्या सचिवांचा समावेश आहे. समिती आवश्यकतेनुसार शेतकरी प्रतिनिधी, साखर कारखान्यांच्या संघटना, राज्य सरकारे आणि इतर तज्ज्ञ किंवा संस्था यांसारख्या संबंधित घटकांशी चर्चा करेल.

आंदोलनाचे काय झाले?

स्वाभिमानी शेतकरी संघटनेचे नेते राजू शेट्टी यांनी दिलेल्या माहितीनुसार, आंदोलनाची पुढील रणनीती आणि निर्णय खालीलप्रमाणे आहेत. आंदोलन स्थगितीचे कारण: गेल्या ३२ तासांहून अधिक काळ चाललेल्या या आंदोलनामुळे सामान्य जनतेला आणि वाहनचालकांना मोठ्या प्रमाणावर त्रास होत होता. जनतेला वेठीस धरण्याऐवजी आंदोलनाची दिशा बदलण्यासाठी हे हायवेवरील आंदोलन तूर्तास स्थगित करण्यात आले आहे.

आंदोलनाची नवी दिशा

शेतकऱ्यांनी आता दोन वेगवेगळ्या पथकांमध्ये विभागणी करून आंदोलन पुढे नेण्याचा निर्णय घेतला आहे. पहिले पथक: ‘कर्नाटक राज्य रयत संघ’ आणि सीमा भागातील शेतकरी कोगनोळी परिसरामध्ये आंदोलनाचे काम पाहतील. दुसरे पथक स्वाभिमानी शेतकरी संघटना महाराष्ट्रातील सोलापूर व इतर जिल्ह्यांमध्ये कारखानदारांनी आंदोलनकर्त्यांची विनंती धुडकावून जे साखर कारखाने सुरू केले आहेत, त्यांचे गाळप बंद पाडण्यासाठी पुढील ३ दिवस प्रत्यक्ष काम करेल ( उद्यापासून कारखान्यातून बाहेर पडणारी साखर अडवणे आणि ऊस वाहतूक बंद करणे यावर भर दिला जाईल.

पुढील पाऊल

ही दोन्ही पथके पुढील तीन दिवसांनंतर एकत्र येऊन मुंबईच्या दिशेने कूच करतील. या बदलामुळे महामार्गावरील कोंडी फुटली असून वाहतूक पूर्ववत सुरू झाली आहे.