ईच्छा भगवंताची परिवाराकडून उपमुख्यमंत्री सुनेत्रा पवार व खा. पार्थ पवार यांचा कौटुंबिक सन्मान
सोलापूर (कटूसत्य वृत्त):- राजकारणात पक्ष बदलू शकतात, मात्र जिव्हाळ्याचे ऋणानुबंध आणि एखाद्या नेत्याविषयीची निष्ठा कायम राहते, याची प्रचिती रविवारी पुणे येथील 'जिजाई' निवासस्थानी आली. ईच्छा भगवंताची परिवाराचे मार्गदर्शक तथा सोलापूर महानगरपालिका प्रभाग क्रमांक २२ चे भाजपा नगरसेवक किसन जाधव यांनी महाराष्ट्राच्या उपमुख्यमंत्री सुनेत्रा वहिनी पवार तसेच राज्यसभा खासदार पार्थ दादा पवार यांची कौटुंबिक सदिच्छा भेट घेत त्यांचा सन्मान केला यावेळी स्वर्गीय तत्कालीन उपमुख्यमंत्री अजितदादा पवार यांच्या जयंतीनिमित्त त्यांच्या हुबेहूब अर्धाकृती मूर्तीची भेट खासदार पार्थ दादा पवार यांना देण्यात आली. हा क्षण उपस्थितांसाठी अत्यंत भावनिक ठरला. नुकत्याच बारामती विधानसभा मतदारसंघाच्या पोटनिवडणुकीत मोठ्या मताधिक्याने विजयी झाल्यानंतर उपमुख्यमंत्रीपदाची धुरा सांभाळणाऱ्या सुनेत्रा वहिनी पवार तसेच राज्यसभेवर बिनविरोध निवड झालेल्या खासदार पार्थ दादा पवार यांचा ईच्छा भगवंताची परिवाराच्या वतीने यथोचित सत्कार करण्यात आला. यावेळी बोलताना नगरसेवक किसन जाधव म्हणाले, आज मी भारतीय जनता पक्षाचा कार्यकर्ता म्हणून जनसेवेचे काम करत असलो, तरी स्वर्गीय अजितदादा पवार यांच्याशी असलेले ऋणानुबंध, त्यांचे मार्गदर्शन आणि विकासाची दूरदृष्टी मी कधीही विसरू शकत नाही. माझ्या राजकीय प्रवासात अजितदादांनी दिलेला विश्वास आणि पाठिंबा ही माझी कायमची प्रेरणा आहे. ही भेट पूर्णपणे पक्षविरहित असून केवळ आदर, आत्मीयता आणि कृतज्ञतेची भावना व्यक्त करणारी आहे. ते पुढे म्हणाले, अजितदादांच्या अकाली निधनाने महाराष्ट्राने एक दूरदृष्टीचा विकासपुरुष गमावला. ती पोकळी कधीही भरून निघणार नाही. मात्र आज महायुतीच्या माध्यमातून उपमुख्यमंत्री म्हणून सुनेत्रा वहिनी पवार आणि राज्यसभेचे खासदार पार्थ दादा पवार यांच्या माध्यमातून अजितदादांचे विकासाचे स्वप्न पुढे नेले जाईल, असा आम्हाला विश्वास आहे. या भेटीत राजकीय सीमांपलीकडे जपलेले कौटुंबिक संबंध, एका नेत्याविषयीची कृतज्ञता आणि विचारांप्रती असलेली निष्ठा यांचे भावनिक दर्शन घडले. स्वर्गीय अजितदादांच्या विचारांवर चालत जनसेवेचा वसा जपणाऱ्या किसन जाधव यांच्या या आगळ्यावेगळ्या सन्मानाने उपस्थितांच्या मनात विशेष आदर निर्माण केला. याप्रसंगी युवा नेते चेतन नागेश अण्णा गायकवाड, विनायक शिवशेट्टी, माणिक कांबळे, महादेव राठोड, यल्लप्पा शिवपुरे, वैभव प्रचंडे यांच्यासह ईच्छा भगवंताची परिवाराचे पदाधिकारी व सदस्य आधी उपस्थित होते.
.JPG)
No comments:
Post a Comment