मोहोळच्या लाळगे सरांचा राज्यस्तरीय यशाचा टप्पा!

 मोहोळच्या लाळगे सरांचा राज्यस्तरीय यशाचा टप्पा!

शिक्षक शैक्षणिक साहित्य निर्मिती स्पर्धेत प्रथम क्रमांक; 

पुणे विभागीय स्पर्धेसाठी निवड

मोहोळ (कटूसत्य वृत्त) :- मोहोळ तालुक्याचा अभिमान वाढवणारी आनंदाची बातमी! जिल्हा परिषद प्राथमिक शाळा क्र. ४ मोहोळ येथील शिक्षक  दत्तात्रय लक्ष्मण लाळगे यांनी महाराष्ट्र शासन आयोजित शिक्षक शैक्षणिक साहित्य निर्मिती स्पर्धेत उत्कृष्ट कामगिरी करून प्रथम क्रमांक पटकावला आहे. त्यांच्या या उल्लेखनीय यशामुळे आता त्यांची पुणे विभागीय पातळीवरील स्पर्धेसाठी निवड झाली आहे.

ही स्पर्धा इयत्ता पहिली ते सातवीच्या विद्यार्थ्यांसाठी बहुउद्देशीय शैक्षणिक साहित्य निर्मिती या विभागात घेण्यात आली होती. लाळगे सरांनी तयार केलेल्या साहित्याला न्यायमंडळाकडून उत्तम प्रतिसाद मिळाला असून त्यांचे सर्जनशील आणि शैक्षणिक दृष्टिकोनातून उपयुक्त कार्य सर्वत्र कौतुकास पात्र ठरले आहे.

लाळगे सरांच्या या यशाबद्दल मोहोळ गटशिक्षणाधिकारी  अविचल महाडिक, विस्तार अधिकारी बंडू शिंदे,  माने, केंद्रप्रमुख  राजकुमार राऊत, अंका साबळे, राजेंद्र बारबोले आणि  सुरेश पवार यांनी त्यांचे मनःपूर्वक अभिनंदन करून पुढील वाटचालीस शुभेच्छा दिल्या.

त्यांच्या या यशामुळे मोहोळ तालुक्यातील शिक्षक वर्ग आणि शैक्षणिक क्षेत्रात आनंदाचे वातावरण आहे. स्थानिक ग्रामस्थ आणि शाळा व्यवस्थापन समितीने देखील लाळगे सरांचा सत्कार करून “मोहोळचा मान उंचावणारा शिक्षक” म्हणून गौरव केला.