सोन्याचे दर उसळू शकतात.

 अमेरिकी फेडरलने २०१७ मध्ये तीनवेळा, तर २०१८ मध्ये व्याजदरात एकदा वाढ केली असून आणखी दोन दरवाढी अपेक्षित आहेत. अमेरिकेने करकपात करताना पायाभूत सुविधांवर मोठ्या प्रमाणात खर्च करण्याच्या चालविलेल्या तयारीमुळे त्यांची वित्तीय तूट वाढणार असून रोखे बाजारातून आणखी कर्ज उभारले जाईल. फेडरल बँक त्यांचे ताळेबंदपत्रक आटोक्यात ठेवण्याच्या प्रयत्नात असताना रोख्यांचा पुरवठा वाढून रोख्यांच्या परताव्यात वाढ होण्याची शक्यता आहे. एकीकडे या सर्व घडामोडींमध्ये चालू वर्षी चलनवाढ दर आणखी वधारण्याचा अंदाज आहे. त्यामुळे सोन्याच्या दरात भरारीचे वादळ हळूहळू आकार घेत आहे. काही व्यवस्थेतील तर काही
सुधारणावादी बदलांमुळे भारतात सोन्याची मागणी घटली आहे. नोटाबंदीच्या निर्णयामुळे आणि त्याच्या विविध परिणामांमुळे सोन्याची रोख खरेदी घसरली आहे. भारतात गेले कित्येक वर्षे सोन्याची खरेदी ही प्रामुख्याने रोखीमध्ये होते. सुधारणावादी उपाययोजांमुळे रोख खरेदीवरील निर्बंधांमुळे बहुतांश बचत सोने अथवा स्थावर मालमत्ता खरेदीऐवजी प्रामुख्याने भांडवली बाजाराकडे वळले आहेत. भारतातील सोन्याची मागणी ७५० टन राहाण्याची शक्यता आहे. यापूर्वी भारतातील सोन्याची मागणी वार्षिक आठशे ते नऊशे टन राहिली आहे. विविध बदलांच्या घटकांमध्ये वस्तू व सेवा करप्रणाली लागू केल्यामुळे सराफ बाजारावर त्याचा मोठा परिणाम झाला. ही करप्रणाली अजून नागरिकांच्या अंगवळणी पडायची असल्याने सोन्याच्या खरेदीत घट झालेली आहे. सोन्याच्या दरातील वाढीबाबत सकारात्मक अंदाज कायम आहे. २०१७ मध्ये सोन्याच्या मागणीने किमान पातळी गाठल्याने निर्माण झालेल्या अस्थिरतेमुळे सोने दरात वाढीसाठी आशादायक वातावरण यापुढे राहाणार आहे. भारतीय बाजारपेठेचा विचार करता यंदाच्या वर्षात दहा ग्रॅमला २८.८०० ते २९,३०० ही आधारभूत पातळी असून ३२,५०० ते ३३,००० रुपयांच्या पातळीपर्यंत सोन्याचे दर उसळू शकतात.