मुंबईत इथेनॉल मॅन्युफॅक्चरर्स असोसिएशन ऑफ इंडियाची महत्त्वपूर्ण बैठक संपन्न

सोलापूर (कटूसत्य वृत्त):- मुंबई येथे इथेनॉल मॅन्युफॅक्चरर्स असोसिएशन ऑफ इंडिया (EMA India) यांची एक महत्त्वपूर्ण आणि दिशादर्शक बैठक नुकतीच पार पडली. या बैठकीत देशातील इथेनॉल उद्योगाची सद्यस्थिती, भविष्यातील आव्हाने आणि संधी यांचा सखोल आढावा घेण्यात आला. इथेनॉल निर्मितीपासून ते साठवणूक, वाहतूक आणि वितरण प्रक्रियेपर्यंतच्या सर्व टप्प्यांवर सविस्तर चर्चा करण्यात आली.

बैठकीदरम्यान विशेषतः इथेनॉल पुरवठ्याच्या संदर्भात तेल विपणन कंपन्यांसोबत (OMCs) येणाऱ्या अडचणी, करार अंमलबजावणीतील व्यावहारिक समस्या, लॉजिस्टिक अडथळे तसेच धोरणात्मक स्पष्टतेअभावी निर्माण होणाऱ्या अडचणी यावर सदस्यांनी आपले अनुभव मांडले. या समस्यांवर सकारात्मक आणि परिणामकारक उपाययोजना सुचवण्यात आल्या असून, त्या संबंधित यंत्रणांपर्यंत पोहोचवण्याचा निर्णय असोसिएशनने घेतला आहे.

असोसिएशनचे कार्यकारी अध्यक्ष या नात्याने बैठकीस उपस्थित राहून सदस्य उत्पादकांचे प्रत्यक्ष अनुभव, अडचणी आणि सूचना ऐकण्याची संधी मिळाल्याचे त्यांनी सांगितले. उद्योगाशी संबंधित निर्णय घेताना सदस्यांचे मत महत्त्वाचे असून, अशा बैठका संघटनात्मक बळ वाढविण्यास उपयुक्त ठरतात, असेही त्यांनी नमूद केले.

या बैठकीस असोसिएशनचे सर्व संचालक आणि देशभरातील इथेनॉल उत्पादक मोठ्या संख्येने उपस्थित होते. सदस्यांचा उत्स्फूर्त प्रतिसाद आणि सक्रिय सहभाग समाधानकारक असून, यामुळे इथेनॉल उद्योगाच्या भविष्यासाठी सकारात्मक वातावरण निर्माण होत असल्याचे चित्र दिसून आले.

इथेनॉल उद्योग अधिक मजबूत करणे, शेतकऱ्यांना त्यांच्या कच्च्या मालाला योग्य दर मिळवून देणे आणि देशाच्या ऊर्जा स्वावलंबनाच्या दिशेने ठोस योगदान देणे, या त्रिसूत्रीवर असोसिएशन कटिबद्ध असल्याचा पुनरुच्चार यावेळी करण्यात आला. केंद्र सरकारच्या इथेनॉल मिश्रण धोरणाला यशस्वी करण्यासाठी उद्योग, शेतकरी आणि शासन यांच्यातील समन्वय अधिक दृढ करण्याची गरज असल्याचे मतही बैठकीत व्यक्त झाले.

एकूणच, ही बैठक इथेनॉल क्षेत्रातील धोरणात्मक दिशा ठरविण्यासाठी महत्त्वपूर्ण ठरली असून, आगामी काळात असोसिएशनच्या माध्यमातून ठोस पावले उचलली जातील, असा विश्वास सदस्यांनी व्यक्त केला.